Чествувањето на Меѓународниот Ден на жената – 8. Март, годинава со право минува во знакот на многубројни манифестации и пригодни свечености: Годинешниот празник на мајката и денот на жената се совпаѓа со навршувањето на 100 години од денот кога Роза Луксембург и Клара Цеткин ја започнаа трнливата битка за рамноправност на жената со мажот и стекнување на правата кои тогаш, но за жал сеуште и денес понекаде во светот,им припаѓаат само на мажите.
Годинешното празнување на Осми Март во Охрид минува во знакот на одржувањето на повеке пригодни манифестации во чија реализација партиципира и Локалната самоуправа. Синоќа во организација на Женскиот Центар „Бисера“, во Центарот за Култура „Григор Прличев“, се одржа пригодна манифестација во рамките на која беше поместена изложба на дела чии автори се жени- сликари, поетесите - членки на ЖЦ „Бисера“ читаа свои стихови, а учениците на ОМУ „Методи Патче“, во знак на честитка за празникот на мајката и жената, изведуваа солистички нумери на повеке музички инструменти.
За организацијата на манифестација говореше историчарот на уметноста, Славко Упевче, за значењето на денот и Женскиот Центар „Бисера“ свое обраќање имаше претседателката на ЖЦ, Нада Мартиноска, а поздравен збор по повод 100 годишнината од одбележувањето на Денот на жената имаше градоначалникот Александар Петрески. Честитајки им го празникот на своите сограѓанки, Градоначалникот го истакна историското значење на 8. Март во функција на потврдување на жената како рамноправен општествен субјект, а посебно пофални зборови упати за активноста на ЖЦ „Бисера“ и другите НВО кои во својата активност ги третираат прашањата сврзани со родовата еднаквост бидејки на тој начин самите жени придонесуваат Охрид да се вброи во редот на оние локални заедници во кои родовата еднаквост претставува составен дел на секојдневието.